Մենք վստահ ենք, որ լեզու սովորելը ոչ միայն բառապաշարի և քերականության յուրացումն է, այլ նաև քննադատական մտածողության, միջմշակութային իրազեկության և արդյունավետ հաղորդակցման հմտությունների զարգացումը:

Անգլերեն լեզու և գրականություն կրթական ծրագրի հիմքում ընկած են մի քանի հիմնական նպատակներ: Նախ, մենք նպատակ ունենք մեր ուսանողներին զինել տեսական և գործնական այնպիսի գիտելիքներով, որոնք անհրաժեշտ են ներկայիս աշխատաշուկայում մրցունակ մասնագետ դառնալու համար: Դասավանդման նորարարական մեթոդների և լեզվական խորը փորձառությունների միջոցով մենք ձգտում ենք մեր ուսանողների մոտ զարգացնել օտար լեզուների ուսուցման նրբությունների խորը ըմբռնումը:

Անկախ այն հանգամանքից, թե շրջանավարտները աշխատանքային գործունեություն կծավալեն կրթական միջավայրում, վարչարարության կամ որևէ այլ ոլորտում, մենք վստահ ենք, որ մեր կրթական ծրագրի միջոցով ձեռք բերված հմտություններն ու գիտելիքները լավագույնս կծառայեն մեր շրջանավարտներին իրենց հետագա գործունեության մեջ:

Մեր ամբիոնի հմուտ պրոֆեսորադասախոսական կազմը անում է հնարավորը, որպեսզի մեր ուսանողները խորքային տեսական և գործնական գիտելիքներ ստանան օտար լեզուների ոլորտում:

Լեզուների, հաղորդակցության և մանկավարժության ամբիոնի վարիչ

բ.գ.թ. Անի Թամազյան