Եվրասիա միջազգային համալսարանի Կառավարման ամբիոնի 3-րդ կուրսի ուսանողուհի Թինա Դիկրանը մասնակցել է Երևանի պետական համալսարանում անցկացված «Անցյալը, ներկան և ապագան Հարավային Կովկասում և հետխորհրդային տարածաշրջանում. ժառանգություն և ապագաղութացում ժամանակակից մշակույթում և քաղաքականության մեջ» (Past, Present and Future in the South Caucasus & Former Soviet Area) միջազգային ամառային դպրոցին։
Ծրագիրն իրականացվել է Շվեյցարիայի Ֆրիբուրգի համալսարանի և Երևանի պետական համալսարանի Քաղաքակրթական և մշակութային հետազոտությունների կենտրոնի համատեղ նախաձեռնությամբ։
Տասնօրյա ինտենսիվ դասընթացների ընթացքում Թինա Դիկրանը, Հայաստանի և Շվեյցարիայի առաջատար բուհերի ուսանողների հետ միասին, հնարավորություն է ունեցել խորացնելու իր գիտելիքները տարածաշրջանային աշխարհաքաղաքականության, Հայաստանի, Վրաստանի և Ուկրաինայի, ինչպես նաև հարևան Թուրքիայի և Իրանի ներքին և արտաքին քաղաքական գործընթացների, քաղաքացիական հասարակության զարգացման, պատմական հիշողության և ապագաղութացման արդի մոտեցումների վերաբերյալ։
Միջազգային ամառային դպրոցին մասնակցությունը կարևոր հնարավորություն է եղել մասնագիտական գիտելիքների ընդլայնման, միջազգային ակադեմիական փորձի ձեռքբերման և տարբեր երկրների ուսանողների ու դասախոսների հետ համագործակցության նոր կապերի ձևավորման համար։
Շնորհավորում ենք Թինա Դիկրանին այս կարևոր ակադեմիական ձեռքբերման կապակցությամբ և մաղթում հետագա հաջողություններ ուսման և մասնագիտական գործունեության մեջ։
