2026 թվականի հոկտեմբերի 27–29-ին տեղի ունեցավ «Կատարելագործի՛ր քո դասընթացը․ դարձրո՛ւ այն իսկապես ուսանողակենտրոն» խորագրով PROFFORMANCE միջազգային աշխատաժողովը՝ նվիրված ուսանողակենտրոն դասավանդմանը, դասընթացների բարելավմանը և միջազգային համագործակցությանը։
PROFFORMANCE-ը բարձրագույն կրթության ոլորտում միջազգային համագործակցության նախաձեռնություն է, որն իրականացվում է Հունգարիայի կառավարության կողմից 1996 թվականին հիմնադրված Tempus հիմնադրամի մասնակցությամբ։ Հիմնադրամը կառավարում է կրթության, վերապատրաստման և ԵՄ-ի հետ կապված հարցերի ոլորտներում միջազգային համագործակցության ծրագրեր և հատուկ նախաձեռնություններ։
Աշխատաժողովը շարունակությունն էր ապրիլ–հունիս ամիսներին անցկացված առցանց փոխուսուցման ծրագրի։ Ավելի քան 300 գրանցվածներից առավել ակտիվ և բարձր արդյունքներ ցուցաբերած 28 մասնակիցների թվում ընտրվել էին Հայաստանի տարբեր բուհերի 9 ներկայացուցիչներ, որոնցից 3-ը ԵՄՀ Ֆարմացիայի ամբիոնի դասախոսներ Լալա Մարգարյանցն էր, Աննա Սուքիասյանը (PhD) և Մարիամ Մինասյանը (MD)։ Ընտրությունը հիմնված էր ծրագրի ընթացքում նրանց ներգրավվածության, փորձի փոխանակման և դասընթացների զարգացման ուղղությամբ կատարած աշխատանքի վրա։
Եռօրյա աշխատաժողովի ընթացքում մասնակիցները գործընկերների և միջազգային փորձագետների աջակցությամբ վերանայել ու կատարելագործել են իրենց դասընթացները՝ անդրադառնալով թվայնացմանն ու արհեստական բանականությանը, միջազգայնացմանը, ներառականությանը և կայունությանը։ Միջազգային թիմերում մշակվել են նաև «Կայուն համալսարանական միջավայր» թեմայով համագործակցային առցանց միջազգային ուսուցման (COIL) դասընթացների գաղափարներ։
Հայաստանի ներկայացուցիչների այս արդյունքը վկայում է ուսանողակենտրոն և նորարարական դասավանդման զարգացման գործում նրանց ակտիվ ներգրավվածության մասին՝ նոր հնարավորություններ ստեղծելով եվրոպական փորձի տեղայնացման և միջբուհական համագործակցության ընդլայնման համար։
