2016 թ. մայիսի 25-ին Եվրասիա միջազգային համալսարանի Կառավարման և ՏՏ ամբիոնում անցկացվեց գիտագործնական սեմինար՝ «Հայ-իրանական տնտեսական հարաբերությունների զարգացման հեռանկարները» խորագրով: Սեմինարը վարեց Կառավարման և ՏՏ ամբիոնի վարիչ տ.գ.թ., դոցենտ Ա.Մարդոյանը: Բանախոսություններով հանդես եկան ուսանողական խորհրդի նախագահ Լիլիթ Ասատրյանը, երկրորդ կուրսի ուսանողներ Տաթևիկ Ղազարյանը, Մերիլին Գասպարյանը և Շնորհիկ Օհանյանը:
Ինտերակտիվ մեթոդով կազմակերպված սեմինարի ընթացքում բանախոսները մասնակիցներին ուղղեցին հարցեր, քննարկեցին կոնկրետ իրավիճակներ՝ փնտրելով ելքեր: Ուսանողները խոսեցին հայ-իրանական հարաբերությունների պատմության, տնտեսական և ռազմավարական հարաբերությունների, տնտեսական համագործակցության հեռանկարների մասին:
Անդրադառնալով հայ-իրանական հարաբերությունների տնտեսական զարգացման հեռանկարներին՝ Ա.Մարդոյանը նշեց. «Իրանը բաց է համագործակցության համար, իսկ շահավետ համագործակցություն կառուցելը մեր ձեռքերում է»: Ա. Մարդոյանը գազի գնի և Իրանից գազ գնելու հարցի առնչությամբ ավելացրեց. «ՀՀ-ն որոշում կայացնելիս պետք է հաշվի նստի իր ավանդական գործընկերոջ՝ Ռուսաստանի հետ, գազի գնի վերաբերյալ անցկացնի քննարկումներ և որպես այլընտրանքային տարբերակ Իրանից ավելի էժան գազ գնի»:
Բարձրացված հիմնախնդրի վերաբերյալ ծավալվեց ակտիվ քննարկում: Ամբիոնի դասախոս տ.գ.թ. Ա. Քցցյանը իր ելույթում նշեց, որ ՀՀ-ում կայուն զարգացող տնտեսության հեռանկարը կապված է հասարակական մտածելակերպի փոփոխության և մարդկային ռեսուրսների ճիշտ օգտագործման հետ. «Երբ մենք անվերջ օգնություն ենք ակնկալում մեր հարևան կամ դաշնակից երկրներից, մենք անտեսում ենք մեր ներքին տնտեսական ներուժը և խոչընդոտներ ստեղծում ուժեղ երկիր դառնալու ճանապարհին»:
Սեմինարի հիմնական նյութերը պատրաստել էին ուսանողները, ինչն ապագա մասնագետների մեջ զարգացնում է հետազոտական և վերլուծական հմտություններ: Ուրախությամբ փաստենք, որ կառավարման մասնագիտության ուսանողները, քաջատեղյակ լինելով քաղաքական-տնտեսական վերջին իրադարձություններին, ժամանակին արձագանքեցին Իրանի զարգացման նոր հնարավորություններին և նկատեցին այն մեծ տնտեսական պոտենցիալը, որը թաքնված է հայ-իրանական հարաբերություններում:
Եվրասիա միջազգային համալսարանում գիտագործնական սեմինար-քննարկումներն արդեն բարի ավադույթ են դարձել և կազմում են ուսանողների առօրյայի կարևոր մաս: Հավելենք, որ այս սեմինար-քննարկումը նախաձեռնվել էր ուսանողական խորհրդի կողմից:
