Այսօր մեկնարկեց հմտությունների զարգացման «Ամառային դպրոց 2021»-ը, որը կազմակերպվում է Եվրասիա միջազգային համալսարանի Դասընթացների կենտրոնի նախաձեռնությամբ։
Դասընթացների մեկնարկն ազդարարեց ԵՄՀ Դասընթացների կենտրոնի պատասխանատու Անի Հովասափյանը: Վերջինս ներկայացրեց «Ամառային դպրոց 2021» ծրագրի նպատակը, ըստ որի, ծրագիրը միտված է երիտասարդների գործնական ունակությունների ու հմտությունների զարգացմանը, սեփական կարողությունների ինքնաբացահայտմանը և գնահատմանը` հետագայում որակյալ, ներկայանալի մասնագետներ դառնալու համար, այնուհետև, մասնակիցների հետ քննարկեց օրակարգային մի շարք հարցեր:
Հաջորդիվ, ԵՄՀ Կարիերայի զարգացման և գործատուների հետ կապերի կենտրոնի պատասխանատու Մերրի Շահբազյանը խոսեց ներկայացման հմտությունների մասին: «Ինչպե՞ս թողնել դրական տպավորություն ներկայանալիս» թեմայի շրջանակում ակտիվ քննարկում կազմակերպեց Անի Հովասափյանը:
Հիշեցնենք, որ դասընթացներն անցկացնում են եվրոպական համալսարաններում վերապատրաստված փորձառու դասընթացավարները. օրակարգում ներառված են նաև հանդիպումներ հանրությանը հայտնի հրավիրյալ մասնագետների հետ։
