30-ից ավելի պետական և մասնավոր ոլորտի հեղինակավոր ընկերություններն ու աշխատանք փնտրող հարյուրավոր ուսանողները միմայնաց հանդիպեցին Եվրասիա միջազգային համալսարանում՝ ամենամյա «Կարիերայի օր» նախագծի շրջանակում:
«Բուհի առաջարկ, աշխատաշուկայի պահանջարկ» խորագիրը կրող միջոցառմանը Հայաստանի առաջատար 30-ից ավելի գործատուները համալսարանի ընդարձակ սրահներում համապատասխան տաղավարներով ներկայացրեցին իրենց ընկերությունները, միաժամանակ լսարաններում անցկացվեցին բազմաթիվ մասնագիտական վարպետության դասեր, որոնց ընթացքում ուսանողները ծանոթացան համապատասխան ոլորտի ձեռքբերումներին և արդի խնդիրներին:
Միջոցառման նպատակը ուսանողներին և երիտասարդ մասնագետներին աշխատաշուկայի նոր պահանջներին իրազեկելն էր, նրանց տեական և գործնական բնույթի լրացուցիչ մասնագիտական խորհրդատվության տրամադրումը և գործատուների հետ անմիջական երկխոսության յուրօրինակ հարթակի ստեղծումը, որը կնպաստի աշխատաշուկայում ուսանողների մրցունակության բարձրացմանը:
ԵՄՀ ռեկտոր, աշխ. գիտ. դոկտոր, պրոֆեսոր Սուրեն Օհանյանը բացելով միջոցառումը՝ ասաց. «Այսօր Եվրասիա միջազգային համալսարանում տեղի է ունենում գործատուի և մասնագիտական շուկայի միջև յուրահատուկ հանդիպում, որտեղ մարդիկ կկարողանան դեմառդեմ շփվել միմյանց հետ, հարցեր ուղղել և ստանալ պատասխաններ: Հնարավոր է նաև աշխատանք գտնել, իսկ գործատուներն էլ՝ իրենց ծրագրերին համապատասխան մասնագետներ: Այսպիսով, հարթակ է ձևավորվել փոխադարձ համագործակցության համար՝ բուհի առաջարկ և աշխատաշուկայի պահանջարկ: Տարիներ շարունակ մենք կազմակերպել ենք կարիերայի օր միջոցառումը, բայց այս տարի այն աննախադեպ է մասնակիցների և այցելուների ակտիվությամբ»:
Գործատուների միության նախագահ Գագիկ Մակարյանը ողջունեց մասնակիցներին և հավելեց. «Սիրելի երիտասարդներ՝ աշխատաշուկան սպասում է ձեզ: Հաշվի առնելով աշխատաշուկայի փոփոխությունները, պետք է արագ արձագանքել մարտահրավերներին, ունենալ նոր մոտեցումներ, տարբեր միջոցառումներ և առաջարկներ»:
Երկուստեք նշեցին, որ կարևոր է կրթությունը մոտեցնել տնտեսությանը, աշխատաշուկան ավելի զարգացնել, նաև մաղթեցին, որ գործատուները հանդիպեն իրենց ապագա աշխատակիցներին:
ՄՍԾ զբաղվածության ապահովման և աշխատանքային ներուժի զարգացման վարչության գործատուների հետ համագործակցության և աշխատանքային միգրացիայի բաժնի պետ Հրայր Հակոբյանը նշեց՝ մեկ հարկի տակ համախմբելով գործընկեր կազմակերպությունների և ուսանողների՝ ընկերություններին հնարավորություն է տալիս ձևավորել գործընկերային հարաբերություններ, հավաքագրել պոտենցիալ մասնագետների և ստեղծել թափուր աշխատատեղերին հավակնող թեկնածուների բազա, իսկ դիմորդներին՝ հանդիպել իրենց ապագա գործատուներին: Միասնական սոցիալական ծառայությունը բարձր է գնահատում աշխատանքային հնարավորություններ ստեղծելուն միտված այս նախաձեռնությունը:
Միջոցառման բացման հանդիսավոր արարողության երաժշտական մասը վստահված էր Ստեփան Ջրբաշյանի անվան երաժշտական դպրոցի տաղանդավոր սաներին:
