Երևանի պետական համալսարանում տեղի ունեցավ Եվրոպական միության «Էրազմուս+» ծրագրի շրջանակում իրականացվող «Հայաստանում ներառական, թվային և կանաչ ուղղվածությամբ բարձրագույն կրթության պատշաճ կառավարման և որակի համար գործունեության առանցքային ցուցանիշների ազգային շրջանակի ստեղծում» (KPI4HE) ծրագրի եզրափակիչ իրազեկման համաժողովը։ Միջոցառումը միավորել էր Հայաստանի բուհական համայնքի և միջազգային գործընկեր կառույցների ներկայացուցիչներին՝ քննարկելու տվյալահենք որոշումների կայացման, ռազմավարական պլանավորման նոր գործիքների և կրթության որակի բարելավման հեռանկարները։
Համաժողովի ընթացքում ներկայացվեցին բուհերի գործունեության գնահատման ազգային շրջանակի նախագիծն ու դրա կիրառման մեխանիզմները, որոնք ընդգրկում են կրթության որակի, հետազոտական ու նորարարական աշխատանքների, միջազգայնացման, ինչպես նաև կառավարման արդյունավետության առանցքային ուղղությունները։
Միջոցառմանը ներկա էր Եվրասիա միջազգային համալսարանի պատվիրակությունը՝ Ուսումնամեթոդական աշխատանքների գծով պրոռեկտոր, տեխ. գիտ. թեկնածու, դոցենտ Ռուբեն Մարկոսյանի գլխավորությամբ, Կառավարման և ՏՀ ամբիոնի վարիչ, տ.գ.թ., դոցենտ Հովհաննես Երիցյանը, Հետազոտական կենտրոնի ղեկավար, պ.գ.թ., դոցենտ Նազելի Նավասարդյանը, ինչպես նաև համալսարանի այլ ստորաբաժանումների պատասխանատուներ:
Պարոն Մարկոսյանը հանդես եկավ ելույթով՝ կարևորելով կատարողականի առանցքային ցուցանիշների (KPI) ներդրումը բուհական համակարգում և ընդգծելով դրանց դերը ռազմավարական պլանավորման, կրթական ծրագրերի արդիականացման ու տվյալահենք կառավարման մշակույթի ձևավորման գործում։
KPI4HE ծրագրի արդյունքների շարունակական կիրառումը էական քայլ է հայաստանյան բարձրագույն կրթության համակարգի մրցունակության բարձրացման, թվային վերափոխման և եվրոպական բարձրագույն կրթական տարածքին ինտեգրման ճանապարհին։
#EIU #EurasiaInternationalUniversity #ErasmusPlus #KPI4HE #HigherEducation #QualityAssurance #EducationArmenia
