Եվրասիա միջազգային համալսարանի գիտական ու կրթական կյանքի համար կարևոր մի շարք հարցեր քննարկվեցին օգոստոսի 26-ին կայացած ԵՄՀ գիտական խորհրդի հերթական նիստում նոր ուսումնական տարվա մեկնարկին ընդառաջ: Քննարկվեցին նոր ուսումնական տարվա կազմակերպմանն ու կրթական գործընթացի արդյունավետ իրականացմանն առնչվող մի շարք կարևոր հարցեր, այդ թվում՝ պրոֆեսորադասախոսական կազմի, ուսումնական գործընթացի ժամանակացույցի, կրթաթոշակների և պետական պատվերի շրջանակում ուսման վարձի փոխհատուցման վերաբերյալ հարցերը։
ԵՄՀ գիտական խորհրդի օրակարգում էին՝ նաև 2026 թվականի ներքին դրամաշնորհների մրցույթի անցկացումը՝ համալսարանում գիտական հետազոտությունների և նոր նախաձեռնությունների զարգացմանն աջակցելու նպատակով։
Քննարկվեց նաև ուսանողների՝ ամառային դպրոցներին և մասնագիտական սեմինարներին մասնակցությունը խրախուսելու նոր համակարգի ներդրման հարցը՝ նպաստելով նրանց մասնագիտական զարգացմանն ու կրթական հնարավորությունների ընդլայնմանը։
Առանձնահատուկ ուշադրության արժանացան նաև 2027-2028 ուսումնական տարվա դոկտորանտուրայի ընդունելության նոր համակարգով դիմելու և ՄԿՈՒ շրջանավարտների դիպլոմների գնահատման սանդղակը բուհ ընդունելության գործընթացում կիրառելու հարցերը։
Նիստի ընթացքում անդրադարձ կատարվեց նաև Erasmus+ KPI4HE միջազգային նախագծի շրջանակում իրականացված աշխատանքներին, ձեռքբերումներին և արձանագրված արդյունքներին։ Քննարկվեցին նախագծի արդյունքների կայունության ապահովման, համալսարանի գործունեության մեջ դրանց շարունակական կիրառման և առաջիկա քայլերի ուղղությունները՝ նպատակ ունենալով ամրապնդել ինստիտուցիոնալ կարողությունները, նպաստել կրթության որակի բարելավմանը և զարգացնել արդյունավետության գնահատման ու կատարողականի ցուցանիշների վրա հիմնված կառավարման մոտեցումները։
Նոր ուսումնական տարի՝ նոր նպատակներով, գաղափարներով ու զարգացման նոր հնարավորություններով։
