Ս.թ. նոյեմբերի 19-ին տեղի ունեցավ Եվրասիա միջազգային համալսարանի Գիտական խորհրդի առցանց նիստը, որը վարում էր խորհրդի նախագահ, աշխ. գիտ. դոկտոր, պրոֆեսոր Սուրեն Օհանյանը:
Առցանց նիստի ընթացքում խորհուրդն անդրադարձավ օրակարգում ներառված մի շարք հարցերի: Մասնավորապես օրակարգային հարցերից էր թեզերի թեմաների ընտրության և պրակտիկաների թեմաների հետ կապակցման հարցը: Հաշվի առնելով նախորդ տարվա դրական փորձը, Գիտխորհրդի որոշեց՝ ավարտական աշխատանքների և մագիստրոսական թեզերի թեմաները մշակելիս հիմք ընդունել դրանց հետազոտական և գործնական ուղղվածությունը, գործատուների կողմից ներկայացված թեմաները, իսկ շրջանավարտների համար, ըստ ամբիոնների, անցկացնել հետազոտական հմտությունների զարգացման վերաբերյալ դասընթացներ՝ անհրաժեշտության դեպքում նաև ընդհանուր մեթոդական բնույթի:
Հետազոտական ինկուբատորի տնօրեն Արևիկ Օհանյանը գիտխորհրդին հանդես եկավ գիտահետազոտական աշխատանքների խթանմանն ուղղված նոր առաջարկներով: Որոշվեց նախապես հաստատված դրամաշնորհային հետազոտությունների ներկայացման ժամկետները երկարացնել 6-ից 8 ամսով։
Միջազգային կապերի կենտրոնի ղեկավար Նունե Ջոմարդյանը ներկայացրեց Էրազմուս+ միջազգային շարժունության ծրագրի ընթացքը և հանձնաժողովի կողմից ընտրված մասնակից ուսանողների ցանկը:
Նիստի օրակարգային կետերից էր նաև «Բանբեր» պարբերականի 2020 թվականի 2-րդ համարի հոդվածների տպագրության երաշխավորությունը, ինչը հաստատվեց Գիտական խորհդի կողմից:
Ուսումնամեթոդական աշխատանքների գծով պրոռեկտոր Իրինա Բաբայանը ամփոփեց 2020-2021 ուստարվա աշնանային կիսամյակի քննությունների արդյունքները, ընթացքի վերաբերյալ խոսեցին նաև մասնագիտական ամբիոնների վարիչները: Գիտխորհրդի անդամները քննարկեցին գործընթացին առնչվող խնդիրները, կայացրեցին որոշումներ դրանց հաղթահարման ուղիների շուրջ:
Ամփոփելով նիստը՝ նախագահ Սուրեն Օհանյանը կարևորեց օրակարգային հարցերի վերաբերյալ համապատասխան որոշումների ընդունումը, որոնք իրենց հերթին միտված կլինեն համավարակի պայմաններում ուսումնառության կազմակերպման արդյունավետության բարձրացմանը։
