Այսօր՝ ս.թ. փետրվարի 25-ին, Եվրասիա միջազգային համալսարանի թիմը դիմավորեց Իսպանիայի Սանտիագո դե Կոմպոստելա համալսարանից ժամանած ուսանողուհի Ջուլիա Մարտինեզ Թոմեին:
Էրազմուս+ ուսանողների փոխանակման միջազգային շարժունության ծրագրի շրջանակում՝ Ջուլիան մագիստրոսական թեզի իր հետազոտությունը կիրականացնի Եվրասիա միջազգային համալսարանի իրավագիտության ամբիոնի համակարգմամբ:
Հայկական գաթայով, երգ ու պարով ԵՄՀ-ում նրան առաջինը դիմավորեց բուհի Ուսանողական խորհուրդը: Ուսանողները պատրաստակամություն հայտնեցին ուսումնառության ողջ ընթացքում մշտապես աջակցել Ջուլիային:
Ավանդույթի համաձայն՝ միջազգային ուսանողին ողջունեց նաև բուհի ռեկտոր Սուրեն Օհանյանը: Ռեկտորը վստահեցրեց օտարերկրյա ուսանողին, որ Եվրասիա միջազգային համալսարանում նա ձեռք կբերի շատ լավ ընկերներ, հնարավորություն կունենան առավել մոտից ծանոթանալու աշխարհում առաջին և ամենահին քրիստոնյա երկրի պատմությանն ու մշակույթին: Ռեկտորը համոզմունք հայտնեց, որ Հայաստանում ունեցած նրա փորձն էական ներդրում կլինի իր կարիերայի զարգացման գործում: Նա Ջուլիային մաղթեց արդյունավետ աշխատանք և հաջողություններ ուսման մեջ:
