Ուրախ ենք տեղեկացնել, որ Եվրասիա միջազգային համալսարանն այս տարի ստացել է ԵՄ աջակցությունը Ժան Մոնե «ԵՄ, անվտանգություն և հիմնարար իրավունքներ» նոր մոդուլի (EUSecJuris) ներդրման համար: Այս մոդուլը կիրականացվի Եվրասիա միջազգային համալսարանում Մարդու իրավունքների և անվտանգության կրկնակի դիպլոմի մագիստրոսական ծրագրի շրջանակներում, որն իրականացվում է Իտալիայի Տուշիա համալսարանի հետ համատեղ:
Մոդուլը նպատակ ունի ներկայացնելու Եվրոպական միությանը որպես անվտանգության գլոբալ և տարածաշրջանային դերակատար: Այդ նպատակով մոդուլը ներկայացնում է «ԵՄ, անվտանգություն և մարդու իրավունքներ» մինի ծրագիրը՝ բաղկացած ներածական և խորացված դասընթացներից, որոնք դասավանդվում են դասախոսների և հրավիրյալ բանախոսների բազմամասնագիտական թիմի կողմից:
Վերոնշյալ մոդուլը նպատակաուղղված է միջազգայնացնել ուսանողների փորձը և ներդնել «սովորել իրականացնելով» դասավանդման մոտեցումը: Այն կիրագործվի՝ կազմակերպելով ուսանողների անվտանգության միջազգային ֆորում և ԵՄ հաստատություններում որոշումների կայացման երկու մոդելավորում, որոնք կենտրոնացած են անվտանգության ժամանակակից խնդիրների և մարտահրավերների վրա (Տուշիայի համալսարանի հետ համատեղ):
Ավելին, որպես նորամուծություն, ակնկալվում է, որ ուսանողները պատրաստեն կարճ տեսանյութեր, որոնք կներկայացնեն ԵՄ-ն և նրա դերը անվտանգության հիմնական մարտահրավերների լուծման գործում (գլոբալ և տարածաշրջանային՝ հատուկ ուշադրություն դարձնելով Հարավային Կովկասում հակամարտությունների կարգավորման հարցում ԵՄ դերին): Թիրախավորելով հանրության լայն շրջանակների՝ տեսանյութերը կբարձրացնեն ԵՄ-ի մասին իրազեկությունը և կծառայեն որպես հանրային դիվանագիտության նախաձեռնություն: Հանրության իրազեկվածությունը կբարձրացվի նաև բաց հանրային դասախոսությունների միջոցով:
Մոդուլը խթանում է Արևելյան գործընկերության տարածաշրջանում ԵՄ-ի՝ որպես գլոբալ դերակատարի դերի վերաբերյալ հետազոտությունը: Մեկ համատեղ հրապարակումը կիրականացվի տվյալ Մոդուլի թիմի համահեղինակությամբ և կհրապարակվի միջազգային գրախոսվող ամսագրում:
Մոդուլը ներառում է Մագիստրոսական մակարդակի հետևյալ դասընթացները.
1) Ծանոթություն եվրոպական օրենքներին․ սկզբունքներ, ինստիտուտներ և որոշումների ընդունման ընթացակարգեր
2) Ծանոթություն ԵՄ արտաքին հարաբերությունների մասին օրենքներին
3) ԵՄ հիմնարար արժեքներ՝ տեսական և գործնական տեսակետից
4) Մարդու իրավունքներ, անվտանգություն և համաչափության սկզբունք
5) ԵՄ-ն որպես անվտանգության դերակատար. ընդլայնումը և ԵՀՔ համատեքստերը
6) Համաշխարհային անվտանգություն, հակամարտությունների կարգավորում և խաղաղության կերտումը․ ԵՄ դերը
