2016 թվականի սեպտեմբերի 29-ին Եվրասիա միջազգային համալսարանի Մարդկային ռեսուրսների կառավարման բաժնի նախաձեռնությամբ պրոֆեսորադասախոսական կազմի համար անցկացվեց «Ուսուցման համագործակցային մեթոդները» թեմայով վերապատրաստման դասընթաց: Մեթոդական այդ դասընթացը նախատեսված է համալսարանի ռազմավարական զարգացման ծրագրով և նպատակ ունի բոլոր մասնագիտությունների գծով փուլ առ փուլ անցում կատարել ուսուցման փոխներգործուն մեթոդների: Սեմինարը վարեց համալսարանի վարժարանի անգլերենի ուսուցչուհի Իննեսա Գևորգյանը: Նա լսարանին մանրամասնորեն ներկայացրեց գաղափարների քարտեզագրման, նախագծային-հետազոտական, փոխներգործուն, բանավեճի, դեպքի վրա ուսուցման և այլ մեթոդները և դրանց հնարավոր օգտագործման եղանակները:
Բանախոսը մեկնաբանեց ուսանողակենտրոն ուսուցման յուրահատկությունները և ընդգծեց նրա դերը ժամանակակից ուսուցման գործընթացներում: Ներկաները նույնպես համոզվեցին, որ նոր ձեռքբերվող գիտելիքը մի ինտելեկտուալ ռեսուրս է և պետք է վերարտադրվի լսարանում՝ դասախոսի և ուսանողների համատեղ մասնակցությամբ:
Սեմինարի մասնակիցների կողմից բարձրացվեցին թեմային առնչվող բազմաթիվ հարցեր, որոնք վերաբերվում էին պրակտիկ գործընթացներում ուսուցման մեթոդների կիրառման եղանակներին: Ծավալվեց ակտիվ քննարկում, դասախոսները եկան ընդհանուր եզրահանգման, որ ուսուցման փոխներգործուն մեթոդները բխում են ժամանակակից պահանջներից, ուսանողին մոտիվացնող գործոնի դեր են խաղում և էապես նպաստում են ուսուցման արդյունավետության բարձրացմանը:
