Եվրասիա միջազգային համալսարանի (ԵՄՀ) Կարիերայի զարգացման և գործատուների հետ կապի կենտրոնը Իրավագիտության ամբիոնի հետ համատեղ օրերս կազմակերպեցին «Իրավաբանի օրը Եվրասիա միջազգային համալսարանում» միջոցառումը, որին մասնակցեցին Երևանի և մարզերի ավագ դպրոցների ու քոլեջների ավարտական դասարանների սովորողները:
Թեմատիկ ելույթներով հանդես եկան ԵՄՀ դասախոսներ Արամ Այվազյանը (ՀՀ Քննչական կոմիտեի տնտեսական հանցագործությունների և մաքսանենգությունների քննության գլխավոր վարչության պետի տեղակալ, ի.գ.թ.), Վարդգես Ֆրանգյանը (ՀՀ փորձաքննությունների ազգային բյուրո ՊՈԱԿ-ի փորձագետ) և Արմեն Հարությունյանը («Universal business solutions» փաստաբանական գրասենյակի հիմնադիր, ՀՀ փաստաբանական պալատի անդամ):
Ներկաները մասնակցեցին ուսանողների կողմից կազմակերպած զուգահեռ ընթացող «Ծնողական իրավունքներից զրկելու պահանջի վերաբերյալ» և «Դատական քննության փուլը ծանր մարմնական վնասվածքի դեպքով» դատական նիստերին, շրջեցին բուհում, ծանոթացան բուհի առաջարկներին, ԵՄՀ ուսանող դառնալու կարգին, իրենց հետաքրքրող հարցերը ուղղեցին մասնագետներին և ուսանողներին:
