Այսօր «Դասընթացների կենտրոն»-ի նախաձեռնությամբ իրականացվող «Ամառային դպրոց-2021» ծրագրի շրջանակում Եվրասիա միջազգային համալսարանը հյուրընկալեց Հայաստանում Իրանի Իսլամական Հանրապետության դեսպանության Արտակարգ և լիազոր դեսպան Ն.Գ. պարոն Աբբաս Բադախշան Զոհուրիին և դեսպանատան ներկայացուցիչներին:
Պարոն դեսպանին բուհում առաջինը հյուրընկալեց ԵՄՀ ռեկտոր, աշխ․գիտ․դոկտոր, պրոֆեսոր Սուրեն Օհանյանը և համալսարանի ներկայացուցիչները։ Մեծարգո դեսպանը և դեսպանատան ներկայացուցիչները ծանոթացան բուհի կրթական ծրագրերին, որակի ապահովման մոտեցումներին, գործատուների հետ համագործակցության հնարավորություններին և ուսանողներին ներկայացվող պահանջներին։ Քննարկվեցին ԵՄՀ և Իրանի Իսլամական Հանրապետության բուհերի միջև համագործակցության հնարավորությունները։
Իր խոսքում մեծարգո դեսպանը փաստեց, որ գիտությունը և կրթությունը յուրաքանչյուր երկրի զարգացման և առաջընթացի հիմքն են հանդիսանում: Այս համատեքստում պարոն դեսպանը նշեց, որ դեսպանատունը պատրաստակամ է իր բոլոր հնարավորությունների սահմաններում Իրանի Իսլամական հանրապետության բուհերի և գիտահետազոտական ինստիտուտների հնարավորություններն օգտագործել Եվրասիա միջազգային համալսարանի հետ համագործակցությունը զարգացնելու ուղղությամբ:
Արդյունքում, պարոն դեսպանի առաջարկով, համատեղ կկազմվի կրթական և գիտական ուղղություններով ճանապարհային քարտեզ և հստակ ժամանակացույց, ըստ որի՝ ուսանողների, պրոֆեսորադասախոսական անձնակազմի փոխանակման ուղղությամբ քայլեր կձեռնարկվեն:
Քննարկմանը հաջորդեց հանդիպումը «Ամառային դպրոց-2021» ծրագրի սաների հետ, որի ընթացում մասնակիցները պարոն դեսպանի հետ քննարկեցին երկու երկրների դիվանագիտական, տնտեսական հարաբերությունները:
