Ս.թ. դեկտեմբերի 28-ին տեղի ունեցավ Եվրասիա միջազգային համալսարանի Գիտական խորհրդի առցանց նիստը, որը վարում էր խորհրդի նախագահ, աշխ. գիտ. դոկտոր, պրոֆեսոր Սուրեն Օհանյանը:
Առցանց նիստի ընթացքում խորհուրդն անդրադարձավ օրակարգում ներառված մի շարք հարցերի: Օրակարգի առանցքային հարցերից էր զուգակցված ուսուցման ներդրման և արդյունավետության գնահատման հարցը: Հարցի շրջանակում ԵՄՀ Ուսումնամեթոդական աշխատանքների գծով պրոռեկտոր Իրինա Բաբայանն ամփոփեց զուգակցված ուսուցման արդյունքները՝ կանոնակարգի ու սկզբունքների համաձայն, ինչի հիման վրա առաջարկվեց Որակի ապահովման կենտրոնին վերանայել առկա կանոնակարգը և մշակել նոր կարգը:
Նիստին անդրադարձ կատարավեց «Ebuh» համակարգի գործարկման ընթացիկ աշխատանքներին: Որոշվեց առաջիկայում համակարգի գործիքակազմի կիրառման վերաբերյալ կազմակերպել խորհրդատվական հանդիպում բուհի պրոֆեսորադասախոսական անձնակազմի և ուսանողների համար:
Հետազոտական ինկուբատորի տնօրեն Արևիկ Օհանյանը գիտխորհրդին ներկայացրեց ԵՄՀ գիտական գործունեության և հետազոտական աշխատանքների իրականացման նոր քաղաքականությունը, հանգամանալից անդրադարձավ վերջինիս առանցքային հիմնադրույթներին, հանդես եկավ գիտահետազոտական աշխատանքների խթանմանն ուղղված նոր առաջարկներով: Որոշվեց հաստատել ներկայացված ուղղությունները և մշակել համապատասխան կանոնակարգեր:
ԵՄՀ Որակի ապահովման կենտրոնի ղեկավար Մարիամ Ջիլավյանը ներկայացրեց պրոֆեսորադասախոսական կազմի գնահատման արդյունքների և վարկանշավորման աղուսյակը, որի հիման վրա գիտխորհրդի որոշմամբ առավելագույն միավորներ ստացած դասախոսներին կշնորհվեն դրամական պարգևներ:
Գիտխորհրդի անդամները քննարկեցին նաև ուսումնական գործընթացի արդյունավետության բարձրացմանն ուղղված այլ հարցեր:
Ամփոփելով նիստը՝ նախագահ Սուրեն Օհանյանը կարևորեց օրակարգային հարցերի վերաբերյալ համապատասխան որոշումների ընդունումը, նշեց, որ 2021 թվականին շահագործման կներկայացվեն բուհի բարեկարգված ենթակառուցվածքները: Նորագույն տեխնոլոգիաներով հագեցած կենտրոնները ուսանողներին կընձեռեն հետազոտություններ իրականացնելու առավել նպաստավոր պայմաններ: