Այս օրերին՝ ս․թ․ մարտի 4-8-ը, ԵՄՀ Որակի ապահովման կենտրոնի ավագ մասնագետ Մարիամ Ջիլավյանը և Իրավագիտության ամբիոնի վարիչի օգնական Լիա Թևոսյանը «Էրազմուս+» միջազգային ծրագրի շրջանակներում գտնվում են Իսպանիայի Վալենսիա համալսարանում։ Վերջիններս «Բարձրագույն ուսումնական հաստատությունների միջազգայնացումը եվրոպական սահմաններից դուրս» խորագրի ներքո մասնակցում են հնգօրյա «Կրեդիտային շարժունության երկրորդ միջազգային շաբաթին»:
Վերապատրաստման դասընթացների օրակարգի շրջանակներում Մարիամ Ջիլավյանն ու Լիա Թևոսյանը ներկայացրել են ԵՄՀ փորձը, կատարել են այցելություններ հյուրընկալող բուհի տարբեր ֆակուլտետներ, մասնակցել են մի շարք հանդիպումների և քննարկումների։ Ինչպես նշում են մեր պատվիրակները, վերապատրաստման ծրագիրը հագեցած ու բազմաբովանդակ է:
Փոխանակման ծրագրին մասնակցում են նաև Բելոռուսի, Հյուսիսային Կորեայի, Մարոկկոյի, Ռուսաստանի Դաշնության, Ուկրաինայի և այլ երկրների տարբեր բուհերի ներկայացուցիչներ։
Հավելենք, որ Եվրասիա միջազգային համալսարանում ձևավորված գեղեցիկ ավանդույթի համաձայն, Լիա Թևոսյանն ու Մարիամ Ջիլավյանն իրենց ձեռք բերած փորձն ու այցի արդյունքները կներկայացնեն իրենց գործընկերներին և ուսանողներին: