Մարտի 09 2016

«Ես վերցնում եմ ինձ հետ գիտելիքի ու ոգեշնչման մի հսկա պաշար»

Ավարտվեց «Երիտասարդների համար ֆինանսական գրագիտություն» թեմայով դասընթացների շարքը:

Եվրասիա միջազգային համալսարանի «Կարիերայի զարգացման եւ գործատուների հետ կապի կենտրոն»-ը Հայաստանի Կենտրոնական բանկի եւ ԱՅՍԵԿ միջազգային կազմակերպության հետ համատեղ կազմակերպել էր «Երիտասարդների համար ֆինանսական գրագիտություն» թեմայով դասընթացների շարք: Դասընթացներն անցկացրեց Բրազիլիայից ժամանած կամավոր Իզաբելա Դե Սկարպա Անզուինոն:

Ծրագրի հիմնական նպատակն էր պատանիներին եւ երիտասարդներին հասանելի դարձնել անձնական ֆինանսների կառավարումը։

Իզաբելան կիսվում է իր տպավորություններով. «Դասընթացաշարի ժամանակ ուսումնասիրեցինք մշակութային եւ հասարակական թեմաներ, կիսվեցինք մեր փորձով, քննարկեցինք մեր երկների եւ մշակույթի վերաբերյալ մի շարք թեմաներ, եւ իհարկե, խոսեցիք կյանքի մեր սպասելիքներից: Բազմաթիվ էին քննարկումներն ապագայի եւ մասնագիտական աճի մասին: Ես վերցնում եմ ինձ հետ նրանց լուսավոր ապագայից մի փոքր հատաված եւ գիտելիքի ու ոգեշնչման մի հսկա պաշար, որ ստացա նրանցից:

Փորձառության կիսումն օգտակար էր նաեւ Անգլերեն լեզվի զարգացման առումով: Քննարկումներին բոլորն էին ակտիվ, ես տեսնում էի բոլորի հետաքրքրվածությունն Անգլերեն լեզվի բարելավման համար: Լսելով արտասանության տարբեր  ձեւեր՝ մասնակիցները կարող էին զարգացնել իրենց լեզվական կարողությունները:

Ուրախ եմ Եվրասիայի հետ կապ ունենալու եւ ուսանողներին հանդիպելու համար: Հուսով եմ դասընթացաշարի շաբաթները նույնքան օգտակար էին եւ հաճելի ձեզ համար, ինչքան որ ինձ համար էին»: